tujh se tere koochey se agar door hue hain

deewane tere aur bhi mashoor hue hain

tum apni jafaon ki ise jeet na samjho

hum ishq ke adaab se majboor hue hain

behtey hue ashkon ko hiqarat se na dekho

jab bhi sar-e-mishgaan yeh ruke toor hue hain

chaho to humain aaj bhi suli pe chadha do

kuch log to har daur main mansoor hue hain

har jashn-e-massarat pe nikal aye hain aansoo

har gham se galey mil ke bhi masroor hue hain

kaanton ki murrawat ne kahin saath na chodha

phoolon ki mulaqaat se ranjoor hue hain

har sang-e-malamat se mulaqaat hui hai

hum jab se tere shaher main mahdood hue hain

lou shama-e-mohabbat ki rais aur badha do

aiwan-e-wafa suntey hain benoor hue hain